تاند: ( سې شنبه، د دلوې پینځمه) په خوست کې د طالبانو د اطلاعاتو او فرهنګ رياست پر سیمه ییزو رسنیو نوي بندیزونه لګولي.
دغه رياست په خپره کړې اعلامیه کې ويلي: له سیمه ییزو رسنیو څخه سندرې او په تفریحي خپرونو کې د ښځو سره ټيلفوني اړیکي نیول سر له را روانې جمعې مبارکې مطلقا بند دي.
دغه ریاست نه دي ويلي، چې دا بندیزونه یې د کوم قانون او صلاحیت په اساس وضع کړي.
مخکې په يو شمېر نورو ولايتونو کې هم پر سیمه ییزو رسنیو بندیزونه لګول شوي وو.
څه موده وړاندې د افغانستان د ژورناليستانو ملي ټولنې وويل، چې په ولايتونو کې د طالبانو د اطلاعاتو او فرهنګ رياستونو ټولې سیمه ییزې رسنۍ سانسور کړي او په خپلو حکومتي رسنيو بدل کړي.