تاند: ( سې شنبه، د دلوې پینځمه) د طالبانو د کابینې ۲۰مه غونډه د دوی د رئیس الوزراء ملا محمد حسن آخند په مشرۍ ترسره شوه.

د طالبانو د خبرپاڼې له مخې، په غونډه کې د غیر دولتي مؤسساتو (NGOs) له خوا د بشري مرستو د توزیع، او ملي پراختیا شرکت په اړه د ټاکل شویو هیئتونو لخوا چمتو شوې طرحې له څیړنې وروسته تصویب شوې.

د طالبانو کابینې پریکړه وکړه، چې د چارو ادارې عمومي ریاست، د مالیې وزارت، د معادن او صنائعو وزارت او د ملي پراختیا شرکت له استازو جوړ شوي هیئت ته دنده وسپارل شوه، تر څو د ملي پراختیا شرکت د نیمګړو پروژو د تکمیل لپاره د مالي منبع پیدا کولو په اړه څيړنه وکړي، تر څو د یادو پروژو پاتې چارې بشپړې شي.

همداشان ويل شوي، چې د زراعت او مالدارۍ په برخه کې د ډونرانو (بسپنه ورکوونکو) صندوق جوړولو په اړه د زراعت وزارت غوښتنه د ښه غور لپاره اقتصادي کمیسیون ته وسپارل شوه چې په اړه یې پریکړه وکړي.

د طالبانو کابینې فیصله وکړه چې ټولې دولتي ادارې مکلفې دې تر څو د بریښنا شرکت هغه قرضونه اداء کړي چې د اسلامي امارت لخوا د کابل له فتحې وروسته اضافه شوي دي.

د ملا حسن اخند په مشرۍ دې غونډه کې د عشر او زکات راټولولو د ادارې د تأسیس، د بشري مرستو په برخه کې د شفافیت او نورو موضوعاتو په اړه هم بحثونه او پریکړې وشوې.