تاند(دوشنبه، د جدي ۲۸مه) په بادغیس ولایت کې ژغورونکو د هغو کسانو د موندلو هلې ځلې کوي چې د دې ولایت په پرونۍ زلزلې کې مړه شوي او کېدای شي تر خاورو لاندې وي.
پرون ماسپښین د دوو پر له پسې زلزلو له کبله په بادغیس ولایت کې لږترلږه ۲۶ تنه مړه شول او سلګونه کورونه ویجاړ یا زیانمن شول.
اندېښنه ده چې د تلفاتو شمېر ممکن تر دې زیات وي او لا هم ځینې کسان تر خاوړو او کنډوالو لاندې وي.
د امریکا د جیالوجۍ د سروې مرکز د لومړۍ زلزلې شدت د ریښتر په کچه ۵،۳ او د بلې، چې له لومړۍ څوساعته وروسته وشوه، ۴،۹ ثبت کړې ده.
د دې زلزلو مرکز له قلعه نو ښار ۵ کیلومتره لېرې تر مځکې ۱۰ کیلومتره لاندې ښوول شوی دی.
ډېره مرګ ژوبله په قادس ولسوالي کې شوې. د دې ولسوالۍ په بادروک کلي کې ۱۵ تنه مړه شوي دي.
د بادغیس د والي ویاند بازمحمد سروري په یوه بیان کې ویلي چې زلزلې له اوو سوو تر زرو پورې کورونه ویجاړ کړي دي. د هغه په وینا ښایي د مړو شمیر زیات شي.
د طالبانو د حکومت مرستیال ویاند انعام الله سمنګاني ویلي، ژغورنکي د نړیدلو کورونو تر خاورخښتو لاندې احتمالي ژوندي پاتې شوي کسان لټوي.
چارواکو ویلي، یوشمیرکسانو د خپلو کورونو د چتونو د راپریوتو له امله خپل ژوند له لاسه ورکړی چې پکې ښځې او ماشومان هم شامل دي.
په بادغیس کې چې د افغانستان له بې وزلو او وروسته پاتې ولایتونو ګڼل کیږي، له دې مخکې هم څو زلزلې شوي چې خلکو ته یې د سر و مال زیانونه اړولي دي.