تاند:(يکشنبه، د جدي نولسمه) په بلخ ولايت د ځايي سرچينو ويلي، چې نن په مرموز ډول د طالبانو لخوا د څلورو وژل شویو کسانو جسدونه موندل شوي او د یوه کس سترګې هم ايستل شوي.
د ړوند شوي او بيا وژل شوي کس (اجمل) خپلوانو ويلي، چې هغه د فروزان ساپۍ په نوم د طالبانو له لوري د څه موده مخکې وژل شوې مدني فعالې د کورنۍ غړی دی.
د اجمل کورنۍ وايي، چې هغه طالبانو بندي کړی و او اوس یې وژل شوی او ړوند شوی جسد موندل شوی.
سرچينه وايي، چې د اجمل جسد له درېیو نورو جسدونو سره د مزار شريف له دشت شور دښتې څخه موندل شوی دی.
په بلخ کې د طالبانو چارواکو په دې اړه څه نه دي ويلي.
له بلخ او ګڼو نورو ولايتونو څخه هره ورځ د داسې وژنو راپورونه په داسې مهال خپريږي، چې طالبان د افغانستان په ټولو سيمو کې د بشپړ امنيت د تامينولو ادعاوې کوي.