تاند: ( سې شنبه، د جدي څوارلسمه) طالبان وايي، چې د کندهار په یو شمېر سیمو کې یې د طبيعي پېښو له کبله زيانمن شوي او په سېلابونو کې ايسار لسګونه کسان ژغورلي.
طالب وياندويانو په دې اړه د ځینو ويډیو ګانو له خپرولو سره لیکلي، چې دغو چورلکو په تېرو شلو کلونو کې افغانان وژل، خو اوس دوی ترې د خلکو د ژغورلو لپاره ګټه اخلي.
د پکتیا پخواني والي محمد حليم فدايي بيا دغه تور ته په غبرګون کې ويلي، چې افغان جمهوري ځواکونو له چورلکو څخه نه يوازې د سېلابونو او طبیعي آفتونو بلکې انساني آفتونو لکه طالبانو او نورو جنګي ډلو څخه هم خلک ژغورل.
د یوه بل خبر له مخې: پرون په کندهار کې د افغانستان د جمهوري نظام د اردو یوه اړونده چورلکه نسکوره شوې ده.
طالبان، چې اوس دغه چورلکې او نور پوځي تجهيزات یې په ولکه کي دي، د چورلکې د سقوط دلیل تخنيکي ستونزه ګڼي او وايي چاته یې پکې زیان نه دی اوښتی.
راپورونه وايي، چې دغه چورلکه MD530 ماډل وه.