تاند:( شنبه، د جدي څلورمه) د افغانستان د خلکو د یووالي ګوند مشر حاجي محمد محقق نن په يوه سفر د ایران پلازمېنې تهران ته تللی او د افغانستان د وضعیت په اړه یې له ایراني چارواکو سره خبرې کړي.
محقق ويلي، چې د دې سفر په ترڅ کې يې نن د افغانستان لپاره د ایران له ځانګړي استازي حسن کاظمي قمي سره لیدلي.
محقق ايراني استازي ته د ملي مقاومت د عالي شورا په استازيتوب ويلي، چې دغه شورا د تاوريخوالي طرفداره نه ده او د بین الافغاني مذاکراتو له لارې د هېواد د قضيې حل ته لومړيتوب ورکوي.
د محقق په خبره، په دې لیدنه کې یې له افغانستان څخه د رواني او فزیکي امنيت د نشتوالي او شديد فقر له کبله ايران ته د میلیونونو افغان کډوالو د ورتلو يادونه هم کړې او له ایراني لوري یې له دغو کډوالو سره د ښه چلند غوښتنه کړې ده.
معلومه نه ده، چې محقق به څومره وخت په ایران کې وي او سفر به یې د ټول ګډونه حکومت جوړولو ته د ایران له لارې د طالبانو په هڅولو او مجبورولو کې څه رول ولري؟
هغه دا سفر په داسې مهال کړی، چې طالبانو نن یو هزاره سياسي فعال ډاکټر عبدالطيف نظري د اقتصاد وزارت د مرستيال په توګه ټاکلی.
دا لومړی ځل دی چې د خپلې اوسنۍ واکمنۍ په ترڅ کې طالبان يو هزاره پر داسې مهمې دندی ټاکي.
طالبانو ايران ته د محقق د سفر په اړه کوم غبرګون نه دی ښودلی.
ايران په وروستيو کې په مکرره توګه په افغانستان کې د ټول ګډونه حکومت پر جوړېدو ټينګار کوي.
دا غوښتنه نيږدې ټول سیمه ییز او نور هېوادونه له طالبانو لري او افغانان هم ټينګار ورباندې لري.