تاند:( سې شنبه، د قوس دېرشمه) راپورونه وايي، چې ډيورنډ کرښې سره څنګ ته په ننګرهار ولایت کې طالب ځواکونو د پاکستاني ځواکونو له لوري د اغزن سيم د لګولو مخنیوی کړی دی.
په دې اړه په ټولنیزو رسنیو کې یوه ویډیو خپره شوې، چې طالبان پاکستاني لوري ته قهریدلي ښکاري او د نار نه لګولو غږ ورباندې کوي.
د طالبانو چارواکو په رسمي ډول په دې اړه څه نه دي ويلي.
د خواله رسنيو يو شمېر استعمالونکو د طالبانو د دغه اقدام ستاينه کړې ده، خو ځینې نورو بیا ورته د شک په سترګه کتلي او ویلي، چې په دې ډول ممکن طالبان د ملت وروستۍ غوسه مهارول غواړي.
دا په داسې حال کې ده، چې پرون له پاکستان څخه کابل ته له راستنېدو سره سم د طالبانو د بهرنيو چارو وزير مولوي امیر خان متقي د پاکستاني صدراعظم عمران خان د یکشنبې ورځې د هغو څرګندونو دفاع وکړه، چې د افغانستان په اړه یې لرلې.
متقي د عمران خان دا خبره د هغه شخصي نظر وباله، چې ویلي وو افغانان په کولتوري لحاظ د ښځينه وو له زده کړو سره حساسيت لري، تېرې حکومتولۍ یې ناکامه وې او دغه هېواد نه پاکستان ته د داعش د خطر غځیدو ګواښ موجود دی.
متقي د عمران خان دا خبرې، هغه هم اسلامي همکاریو سازمان په غونډه کې د ده د موجوديت پر مهال د عمران خان شخصي نظر وباله.
طالبان په وروستيو کې د پاکستان په لاسپوڅي توب او د ستراتيژيکو هدفونو د عملي کولو لپاره یې په کار کولو ډېر تورنیږي، خو دوی دا تورونه بې بنسټه ګڼي.
د طالبانو داخلی مشروعیت یوازی د پاکستان سره په قاطع برخورد کی دی!