تاند (پنجشنبه، د قوس ۲۵مه) نامعلومو بې پېلوټه الوتکو د پنجشنبې په ماښام ډیورنډ کرښې ته نژدې د کونړ ولایت پر یو شمېر سیمو بمباري کړې ده.
په کونړ کې د طالبانو چارواکو د نامعلومو بې پېلوټه الوتکو له لوري د کونړ په ځینو سیمو د بې پېلوټه الوتکو بمباري تایید کړې ده.
د کونړ د اطلاعاتو او کلتور ريیس نجیب الله حنیف خبریالانو ته ویلي چې شاوخوا ۵ بجې وې چې د باجوړ قبایلي سیمې ته نژدې د شلتن ولسوالۍ پر چوګان سیمه کې د بې پېلوټه الوتکو له لوري بمباري وشوه.
د حنیف په وینا تر اوسه څرګنده نه ده چې حمله کوونکې بې پېلوټه الوتکې به د چا وې خو د سیمې اوسېدونکو تاند ته ویلي چې الوتکې له پاکستان څخه الوتې وې او غالباً یې هدف په سیمه کې پاکستاني طالبان وو.
له بلې خوا په کابل کې د طالبانو د حکومت ویندی ذبیح الله مجاهد ویلي چې د دوی له معلوماتو سره سم د پاکستان له خاورې پر کونړ ولایت توغندويي بریدونه شوي او د طالبانو د بهرنیو چارو وزارت دا موضوع له پاکستاني چارواکو سره مطرح کوي.
پاکستان له کلونو راهیسې ډیورنډ کرښې ته څېرمه د کونړ پر سرحدي سیمو د درنو وسلو ګوزارونه کوي چې له کبله یې زرګونه کورنۍ د خپلو مېنو پرېښودو ته اړ شوې دي.
د سیمې اوسېدونکي وايي چې پاکستان غواړي خپلې پوستې رامخکې کړي او په دې توګه پر کونړ سین لا زیات کنټرول ترلاسه کړي.