تاند:( چار شنبه ، د قوس څلور ویشتمه) د طالبانو د ماليې وزارت وياند احمد ولي حقمل ژمنه کړې، چې د دولتي کارکوونکو د دوو مياشتو معاشونه به ورکړل شي.
نوموړي د دې وعدې د زر عملي کیدو وعده کړې او ويلي، چې دا کار به په نيږدې راتلونکي کې ترسره شي.
دغه طالب وياند د تېرې میاشتې په ۲۹ مه د یوې خبري ناستې پرمهال ژمنه وکړه، چې زر به د دولتي کارکوونکو د درېيو مياشتو معاشونه ورکړل شي.
له هغې ژمنې دا دی، یوه میاشت په پوره کیدو ده، چې طالبان د خپلې واکمنۍ له څلور مياشتيني کیدو سره د دوو مياشتو د معاشونو د ورکړې ژمنه کوي.
تېره اونۍ د طالبانو يوه مطبوعاتي مشر سهیل شاهین له افغانستان انټرنشتال ټلويزيون سره په مرکه کې ادعا وکړه، چې ټولو دولتي کارکوونکو ته د ۳ مياشتو معاشونه ورکړل شوي.
د دولتي ادارو کارکوونکي وايي، چې د بې معاشۍ له کبله سختو ستونزو سره مخامخ دي.
دوی اوج ته رسېدلی اقتصادي او بشري ناورين، د توکیو او لګښتونو لوړیدل، خونړی ژمی او نورې ستونزې د بې معاشۍ اړوند ګڼي او وايي، چې حتی دفترونو ته د تلو کرايه قرضوي.
معلومه نه ده، چې د طالبانو دغه تازه وعده به کله پوره شي؟
نن پر افغانستان د طالبانو د واکمنیدو څلور میاشتې پوره کیږي.