تاند:( سې شنبه، د قوس درويشتمه)‏‏‏‏ له پکتيا ولايت څخه د يوه ځوان فلسفي ليکوال او د کابل پوهنتون د محصل بخت الله نيږدې سرچينو تاند ته ويلي، چې دغه ځوان لیکوال بيا طالبانو نیولی او نادرکه کړی دی.

بخت الله چې د کابل د ښونې او روزنې پوهنځي یو غریب او یتیم محصل وو څلور هفتې وړاندې د طالبانو له خوا پکتیا کې ونیول شو.

هغه درې ورځې نادرکه و، خو په ټولنيزو رسنيو کې يې په اړه له بحثونو وروسته طالبانو ظاهرا د خلکو د کرارولو لپاره نوموړی خوشې کړ.

اوس سرچینې وايي، چې دغه ځوان لیکوال په پکتيا کې د طالبانو استخباراتو بيا نیولی او د مرګ و ژوند معلومات یې نشته.

د نوموړي د خپلوانو له قوله چې هغه یې د لمړي ځل زندان په وخت کې ډیر زیات شکنجه کړی وو او د وژلو تصمیم یې درلود، خو دا چې موضوع یې رسنیزه شوه نو مرګ یې وځنډول شو.

نولس کلن بخت الله چې مور او پلار یې وخته وفات شوي دي او هیڅ ورور نلري د ټولې کورنۍ یواځینی سرپرست دی.

د هغه له نیولو سره نه یواځې چې د هغه د کورنۍ غړي او خویندې خواشیني دي بلکې بې سرپرسته او بي ډوډۍ شوي هم دي.

طالبانو د نوموړي د نیولو په اړه څه نه دي ويلي.

د دوی د بهرنيو چارو وزير مولوي امیر خان متقي تازه، په يوه بهرنۍ مرکه کې ادعا کړې چې د مخکيني نظام د منسوبينو او خواخوږو په ګډون دوی هیڅوک له طالبانو سره د مخالفت په خاطر وژلي يا شکنجه کړي نه دي.

د يادونې وړ ده، چې طالبان په دې اړه په خبرو او عمل کې د سخت توپير له کبله سختو نيوکو او بې باورۍ سره مخامخ دي.