تاند:( پنجشنبه، د ميزان اتمه) طالبانو کابل کې د لسګونو هغو ښځينه معترضینو د را ټولیدو ممانعت کړی، چې غوښتل يې د طالبانو لخوا د دوی د تلف شویو تعليمي او کاري حقونو د بیرته ورکولو لپاره عدالت غوښتنه وکړي.
دا ښځې د کابل ښار په یوه سړک کې را ټولې شوې وې، چې د یوې خپرې شوې ویډیو له مخې طالب وسله وال يې په زور او تشدد مخنیوی کوي.
د دغه تشدد پر وخت د هوايي ډزو غږونه هم اوریدل کیږي.
خپره شوې ویډیو ښیي، چې یوه معترضه ښځه د طالب وسله وال د ګوزاونو پر وخت زارۍ کوي، څو نور ګوزارونه پرې ونه کړي.
طالبانو په دې اړه څه نه دي ويلي.
پر افغانستان د دې ډلې د واکمنیدو شاوخوا یوه نیمه میاشت کیږي، خو دوی لا ښځو ته له شپږم ټولګي د پورته زده کړو او دغه راز د کار اجازه نه ده ورکړې.
له دې او مطلق طالبي رژيم د جوړولو له وجې، نړیوالې او حتا د طالبانو تر ټولو اصلي ملاتړي هېواد پاکستان هم د دې ډلې حکومت په رسمیت نه دی پېژندلی.