تاند:( جمعه، د میزان ۲مه) د هندوستان صدراعظم نریندرا مودي د امریکا متحده ایالاتو د ولسمشر له مرستیالې کامله هریس سره د افغانستان په اړه خبرې کړي.
د هندوستان اینډیا ټوډۍ ورځپاڼې د دې لیدنې یوازې خبر خپور کړی او نور جزیات یې په دې اړه نه دي ورکړي.
ویل شوي، چې دغه لیدنه د ملګرو ملتونو د کلنۍ عمومي غونډې په څنډه کې شوې ده.
کامله هریس خپله هم اصلاً هندي توکمه ده.
هندوستان څو ورځې مخکې له نړۍ وغوښتل، چې پر طالبانو دې د افغانستان له خاورې د نورو هېوادونو خلاف د نه استفادې تضمین واخلي.
د سعودي عربستان د بهرنیو چارو وزیر هم څو ورځې مخکې هندوستان ته تلی او له هغه ځایه ویلي و، چې هېواد یې تراوسه طالبان په رسمیت نه دي پېژندلي او د شرطونو پوره کیدو ته منتظر دی.
داسې ښکاري، چې د سیمه ییز بلاک( روسیې، چین، پاکستان) پر وړاندې په سیمه او نړۍ کې د امریکا متحده ایالاتو متحدینو بل بلاک جوړولو ته خواري زیاته کړې، څو طالبان تر سختو فشارونو لاندې ونیسي او له دوی څخه لرلې اندیښنې یې حل شي.