تاند(چهارشنبه، د سنبلې ۱۰) د افغانستان بانک د بورډ یوه جګپوړي غړي د امریکا له خزانې وزارت او د پیسو له نړیوال صندوق څخه وغوښتل چې په هیواد کې د اقتصادي بحران د مخنیوي لپاره د طالبانو په مشرۍ حکومت ته د افغانستان د اسعاري زېرمې محدوده اجازه ورکړي.
د افغانستان نژدې ۹ نیم ملیارد ډالره اسعاري زېرمه په امریکا کې ساتل کېږي.
د امریکا په مریلنډ کې د مونټګومري پوهنتون د اقتصاد استاد شاه محرابي، چې له ۲۰۲۰ څخه د افغانستان بانک د بورډ غړی هم دی، نن / چهارشنبه رویټرز خبري اژانس ته ویلي چې که د افغانستان اسعاري زېرمه کنګل پاتې شی، دا هیواد به هرومرو له یوه اقتصادي او بشري بحران سره مخامخ شي.
محرابي ټینګار کړی چې دا خبره د طالبانو لپاره یا د طالبانو له لوري نه کوي بلکې د افغانستان بانک د بورډ د یوه غړي په توګه کوي.
ده زیاته کړې، په پام کې لري چې روانه اوونۍ د امریکا د کانګریس له غړیو سره وویني، او هیله لري چې ژر د امریکا د خزانې وزارت له چارواکو سره هم وګوري.
محرابي ویلي«که نړیواله ټولنه غواړي چې په افغانستان کې د اقتصاد د سقوط مخه ونیسي، یوه لاره به یې دا وي چې افغانستان پرېږدي چې خپلې اسعاري زېرمې ته محدود لاسرسی ومومي.»
د ده په وینا که افغانستان په اوس وخت کې اسعاري زېرمې ته لاس پیدا نه کړي نو د افغانستان اقتصاد به بد ګوزار وخوري او د عامو افغانانو تنګ لاسي به نوره هم زیاته شي.
محرابي وړاندیز کوي چې په اوس وخت کې دې د افغانستان نوي حکومت ته د ۱۰۰ او ۱۲۵ ملیون ډالرو ترمنځ پیسې ورکړل شي او هغه دې د نړیوالو له لوري وڅارل شي چې په څه مصرفېږي.