تاند (جمعه، د زمري ۲۲مه) — د وسله والو طالبانو ویاند ذبیح الله مجاهد وایي، کندهارته د څېرمه زابل ولایت مرکز کلات ښار یې نیولی دی.
مجاهد دا خبر په خپل ټوېټر اکاونټ خپور کړی او ویلي یې دي چې ملګرو یې د ولایت مهمې ادارې نیولي دي.
د طالبانو ویاند لیکلي، «#عاجل: د الفتح عملیاتو په جریان کې د زابل ولایت مرکز کلات ښار هم فتحه شو،»
نوموړي د ټویټ په دوام لیکلي، «په یاد ښار کې د ولایت مقام، امنیه قومندانۍ، د استخباراتو مرکز او ټول ملحقات د مجاهدینو لاس ته ورغلل.عسکرو وسله په ځمکه کیښوده او مجاهدینو ته راغلل. ټول وسائط، وسلې او مهمات د مجاهدینو لاس ته ورغلل.»
ویل کیږي چې په دې سره د هغو ولایتونو شمېر ۱۷ ته ورسېد چې تر اوسه د طالبانو لاس ته ورغلي دي.