تاند (شنبه د سرطان ۱۲) په کندهار کې د نی یا د ازادو رسنیو د ملاتړ اداره وايي، په دغه ولایت کې تر لسو زیاتو ښځینه خبریالانو د تهدیدونو له امله خپلې دندې پریښي دي.
اريا رحمت کندهار کې د يوې خصوصي راډيو د ټولنیزو خپرونو پروډیوسره ده وایي، د ناامنۍ ترڅنګ کلتوري محدويتونه او د ښځینه خبریالانو د کار او فعالیت پر وړاندې د یو شمېر خلکو منفي لیدلوری د دوی د کار پر وړاندې لوی خنډونه دي.
آغلې رحمت زیاتوي، «دلته زموږ خلک يو داسې ذهنیت لرې، که چېرې يوه خبرياله وې، مثلا د ټلوېزيون پر پرده کار کوې يا د راډيو د لارې کار کوې، بیا هم دوی خراب نوم ورباندې ږدې، هغوي خو وایې، چې خبريال د ټولنې د ذهنيت خرابوونکی دئ، خو زموږ خلک چې ووینې يوه انجلۍ په راډيو کې کار کوې، يا د تلوېزيون پر صفحه راغلې بېلابيل نومونه ورباندې ږدې چې هغه نومونه تاسو ټولو ته معلوم دي.»
نجیبه او مرینا فناهي بیا وايي، اقتصادي ستونزې، د خبریالانو پر وړاندې شته تهدیدونه او د هغوی نامعلوم راتلونکی د دې لامل شوی چې یو شمېر ښځینه خبریالانې خپلې دندې پریږدي.
دوی په اداراتو کې د منظم معاش نه درلودل، ښځينه کارکوونکو ته صلاحيتونه نه ورکول، د امنيت نه شتون او اقتصادې ستونزې هغه لاملونه بولي چې ښځینه خبریالانې یې دندو پرېښودو ته اړ کړي دي.
ورته مهال کندهار کې د نی يا د ازادو رسنيو د ملاتړ ادارې مشر عبدالسميع غيرتمل وایي، د خبریالانو پر وړاندې وروستیو تهدیدونو په ځانګړي توګه په ننګرهار کې د ښځینه خبریالانو د وژل کېدو پېښې د دې لامل شوې چې دغه ولایت کې تر لسو زیاتې ښځینه خبریالانې خپلې دندې پریږدي.
نوموړی زیاتوي، په کندهار کې له ۳۰-۴۰ ښځینه خبریالانې او پروډیوسرانې په کار بوختې وې، خو وروستۍ پېښې د دې لامل شوې چې تر لسو ډېرو هغو یې خپلې دندې پرېښودې.
د ښاغلي غیرتمل په خبره، په ټولیز ډول کندهار کې د خبریالانو پر وړاندي تهدیدونه د دې لامل شول چې هغوی کاري ساحې ته ولاړې نه شي او یا هم له هېواده بهر او نورو ولایتونو کې ځانونه خوندي کړي.
په افغانستان کې د خبریالانو د ملاتړ بنسټونه تېرکال د افغان خبریالانو لپاره خونړۍ بولي او وايي چې شااوخوا ۱۳ خبریالان په افغانستان کې د هدفي وژنو په بېلابېلو پېښو کې یو په بل پسې ووژل شول.