تاند (دوشنبه د تلې ـ میزان ۲۸مه) د هېواد پخواني ولسمشر حامد کرزي د هند خلکو او د نړۍ ټولو هغو وګړو ته چې دیوالي نمانځي، مبارکي ویلې ده.
دیوالي د هندوانو مهم مذهبي جشن دی، چې پر تیارو د رڼا بري نښه ګڼل کېږي.
دا جشن هر کال د اکتوبر او نومبر میاشتو ترمنځ پنځه ورځې دوام کوي او خلک یې د څراغونو، شمعو، خوږو او نورو مذهبي او دودیزو مراسمو په ترسره کولو نمانځي.
په هند او ګڼو نورو هېوادونو کې دا ورځ د کورنیو د یووالي، بخښنې او خوښیو د شریکولو د ورځې په توګه لمانځل کېږي.