تاند (سې شنبه د تلې ـ میزان ۲۹مه) اسراني د هندي فلمونو په نړۍ کې د خندنۍ یا کومیډي د رولونو له امله شهرت درلود او له شپېتو کلونو ډېر یې په سلګونو فلمونو کې کار کړی و.
هندي رسنۍ وایي هغه د ۸۴ کلونو په عمر ومړ.
د هند لومړي وزیر نریندرا مودي د هغه د مړینې په تړاو ویلي: «اسراني یو تکړه او څو اړخیز هنرمند و، چې د بېلابېلو نسلونو خلکو ته یې خندا او خوښي ډالۍ کړې. د هغه ونډه به د هند سینما کې تل ژوندۍ وي.»
د فلمي نړۍ یو بل وتلی ستوري اکشي کومار هم د اسراني د مړینې پر خبر خواشیني څرګنده کړې.
هغه ویلي: “موږ یوازې یوه اوونۍ مخکې د هایوان فلم پر سیټ سره لیدلي وو. اسراني یو ډېر مهربان انسان و او ما ترې ډېر څه زده کړل.دا زموږ د فلمي صنعت لپاره یوه ستره ضایعه ده.”
اسراني په مشهورو فلمونو شولې (Sholay)، هیرا فېري (Hera Pheri) او امر، اکبر، انټني (Amar Akbar Anthony) کې د پام وړ رولونه لوبولي وو.
اسراني د ۱۹۶۰مو کلونو په وروستیو کې د سینما له لارې خپل هنري ژوند پیل کړی و.