تاند (چهارشنبه د سرطان ۹) امریکا یو ځل بیا په افغانستان کې پر روان وضعیت په ځانګړې توګه د ملکي وګړو د تلفاتو پر زیاتوالي اندېښنه ښودلې او په طالبانو یې غږ کړی چې تاوتریخوالی پای ته ورسوي او د سولې د مذاکراتو مېز ته حاضر شي.
په کابل کې د امریکا شارژدافیر راس ویلسن نن چهارشنبه پر خپل ټویټر لیکلي: “لکه څنګه چې موږ په افغانستان کې د رسنیو رپوټونه او د طالبانو د بریدونو او د ملکیانو د هدفي وژنو په اړه د لومړي لاس معلومات ګورو نو په طالبانو غږ کوو چې روان تاوتریخوالی پای ته ورسوي او بېرته د خبرو مېز ته راوګرځي”.
(1/2) As we see media reporting and firsthand accounts of Taliban offensives in different parts of the country and targeted attacks against civilians across Afghanistan, we call on the Taliban to end the ongoing violence and return to the negotiating table.
— Chargé d’Affaires Ross Wilson (@USAmbKabul) June 30, 2021
ښاغلي ویلسن دغه راز د امریکا د بهرنیو چارو وزارت د ویاند نډ پرایس څرګندونو ته په اشارې چې د روانې جون میاشتې په ۲۲مه یې کړي ویلي دي چې نړۍ به په افغانستان کې په زوره د یو تحمیلي حکومت راتلل ونه مني.
کابل کې د امریکا شارژدافیر داسې مهال په طالبانو د تاوتریخوالي د کمېدو غږ کړی چې د افغانستان په ډېرو ولایتونو کې جګړه مخ په زیاتېدو ده او هره ورځ د ولسي خلکو په ګډون د جګړې دواړو لوریو ته درنه مرګ ژوبله اړوي.
د همدې جګړې له امله د افغانستان په شمالي ولایتونو کې ګڼ شمېر ولسوالۍ د افغان ځواکونو او طالبانو تر منځ لاس په لاس شوي هم دي.
په افغانستان کې داسې مهال د جګړو د شدت راپورونه ورکول کېږي چې په قطر کې د افغان دولت او طالبانو ترمنځ د سولې خبرې له څو میاشتو راهیسې په ټپه ولاړې دي او دواړه خواوې په دغو مذاکراتو کې د خنډ ملامتي په یو او بل وراچوي.