تاند ( شنبه، د سرطان ۵) افغان لوبغاړی محمد نبي عیسی خېل دمګرۍ د انګلستان په سوداګریز لیګ یا ویټاليټې بلاسټ کې لوبېږي.
نوموړي تېره شپه په یاده لوبه کې ښه توپوهنه او هم ښه توپ اچونه ترسره کړه.
هغه په توپ اچونه کې د کمو منډو په ورکړې سره خپله لوبډله بریا ته ورسوله او خپله هم د لوبې غوره لوبغاړی شو.
په دې لوبه کې د محمد نبي اړوند لوبډلې لنکاشایر په ټاکلو ۲۰ اورونو کې د ۷ لوبغاړو په سوځېدو ۱۳۰ منډې وکړې،
نارت همپټن شایر ټاکل شوی هدف په ۱۹ ام اورو کې د ۳ لوبغاړو په سوځېدو پوره او لوبه یې د ۷ ویکټو په توپیر وګټله.
محمد نبي په توپ اچونه کې د کوم لوبغاړي له سوځولو پرته په ۴ اورونو کې کمې ۱۸ منډې ورکړې او په توپ وهنه کې یې بیا مهمې ۲۷ ناسوځېدلې منډې وکړې.
په یادو لوبو کې تېره ورځ د قېس احمد لوبډلې کینټ هم له ایسیکس سره لوبه ترسره کړه چې د ډي ایل قانون له مخې یې د ۲۸ منډو په توپیر بریا خپله کړه.
دغه راز د نوین الحق لوبډلې لیسټر شایر بیا له یارکشایر سره لوبه ترسره کړه، چې لیسټر شایر د ۳۴ منډو په توپیر لوبه وګټله.
نوین الحق بیا تر دې دمه په روانو سیالیو کې په توپ اچونه کې مخکښ او لومړی مقام لري.