تاند – امریکا وایي، د کورونا د دریمې څپې سره د مبارزې په موخه د افغانستان په ګډون د نړۍ یو شمېر هېوادونو ته د کورونا ضد واکسین ورکوي.
د امریکا حکومت په یوه تازه اعلان کې ویلي چې د روانې جون میاشتې تر پای پورې به د نړۍ یو شمېر هېوادونو ته ۸۰ میلیونه نور د کرونا ضد اضافي واکسین ورکړي.
د امریکايي چارواکو په وینا په یادو هېوادونو کې چې دا واکسین به ورکول کیږي افغانستان هم شامل دی.
امریکايي چارواکي وايي د یو ځانګړي پلان له مخې به د دغو ۸۰ میلیونه دوزه څخه ۲۵ میلیونه دوزه هغو سیمو ته ورکړل شي چې واکسین ته ډېر ضرورت لري.
د سرچینې په وینا، له دغې ډلې څخه به یې شاوخوا اووه میلیونه دوزه اسیا ته ورکول کیږي چې افغانستان، پاکستان، بنګله دېش، هند، سريلانکا، اندونیزیا، لاوس، مالیزیا، مالدیف، نیپا، پاپوانیوګیني، د پاسفیک ټاپوګان، فلپین، تایوان، تایلنډ او ویتنام په کې شامل دي.
د امریکا حکومت دغه راز زیاته کړی چې د امریکا د دغو اتیا میلیونه دوزه واکسین څخه به ۱۹ میلیونه دوزه د کم او منځني عاید لرونکو هېوادونو ته ورکول کیږي.
دا په داسې حال کې ده چې په افغانستان کې د کورونا وبا دریېمه څپه په خورا چټکۍ د خپرېدو په حال کې ده او هره ورځ ترې لسګونه کسان خپل ژوند بایلي.
د دغي ناروغي د مخنیوي په موخه افغان حکومت د دوو اوونیو لپاره د ښوونیزو مراکزو د بندېدو پرېکړه هم اعلان کړې ده.