تاند ( شنبه، د جوزا ۱۵) ختیځ کې د ۲۰۱ سيلاب قول مسوولان وایي، د درېیمې پلې لوا اړوند سيمه یيزې اردو تېره شپه د ننګرهار په خوږیاڼو ولسوالۍ قیلغو سیمه کې د وسله والو طالبانو هغه ډرون کمره، چې د هاوان مرمۍ به یې لېږدولې له منځه وړې ده.
د سرچینې په وینا د طالبانو دې ډرون کمرې به د هاوان مرمۍ لېږدولې او پر افغان ځواکونو به یې غورځولې.
ختیځ کې د ۲۰۱ قول اردو ویاند وایي ، د طالبانو دغه کمره په داسې حال کې ويشتل شوې، چې په ياده سیمه کې د سيمه ييزې اردو پر څوارلسم ټولي د برید پلان درلود.
بل لورته طالبانو بیا تر اوسه په دې اړه څه نه دي ویلي.
دا ډرون کمره داسې مهال له منځه وړل کېږي، چې د ځایي خلکو په خبره دخوږیاڼو ولسوالۍ په ځینو سیمو کې اوس هم د افغان ځواکونو او طالبانو ترمنځ جګړه روانه ده.
چارواکي وایي، په خوږیاڼو ولسوالۍ کې د طالبانو د ځپلو په موخه د افغان ځواکونو عملیاتو په چټکۍ سره دوام لري.