تاند (شنبه د جوزا ۸مه) عامې روغتیا وزارت، یو ځل بیا د کورونا ویروس له امله پوهنتونونه، ښوونځي او ټول ښوونیز مرکزونه د دوه اونيو لپاره رخصت اعلان کړل.

له عامې روغتيا وزارت څخه په خپره شوې خبرپاڼه کې راغلي چې د کورونا ويروس د دریمې څپې د خپرېدو مخنيوي په موخه به د هېواد په ١٦ ولايتونو، کابل، غزني، هلمند، کندهار، لوگر، ننگرهار، پکتیا، پروان، میدان وردګ، پنجشیر، بلخ، لغمان، بدخشان، کاپیسا، کندز او نيمروز کې ښوونیز بهیر سر له نن شنبې د دوه اونیو لپاره وتړل شي.

په خبرپاڼه کې وړاندې راغلي، دا پریکړه وروسته له هغې شوې، چې په هېواد کې د کورونا ویروس د تازه ثبت شوو پېښو شمېر په یو ورځ کې سلګونو ته ورسیده.

لوړو زده کړو او پوهنې وزارت لا تر اوسه د دې پریکړې په اړه څه نه دي ویلي.

کابل ښاروالي هم د تېرې پنجشنبې په ورځ پریکړه وکړه، چې د یاد ویروس د خپریدو د مخنیوي په موخه به راتلونکې اونۍ په کابل کې د ودونو د مراسمو تالارونه وتړي.