تاند(دوشنبه، د جوزا ۳) د ولسي جرګې رییس میررحمان رحماني ویلي، په فاریاب کې د اوسني وضعیت دوام ترهګریز فعالیتونه رامنځته کوي.
د رحماني په خبره، چې د فاریاب د نوي والي پر ضد لاریونونه به د دغه ولایت امنیتي وضعیت خراب کړي او ترهګریزو فعالیتونو ته به لاره هواره کړي.
رحماني زیاته کړې، چې که دا حالت همداسې دوام وکړي، نو د دغه ولایت د ځینو ولسوالیو سقوط به د اوسني حاکم وضعیت د ګډوډۍ له امله وي.
د ولسي جرګې مشر د فاریاب په لانجه کې پر ټولو ښکېلو کسانو غږ کړی، چې ژر تر ژره خپلمنځیو ستونزو ته سیاسي حل لاره پيدا او په دغه ولایت کې د پېښېدونکو ترهګریزو فعالیتونو مخنیوی وکړي.
رحماني دا څرګندونې داسې مهال کړې، چې لس ورځې وړاندې محمد داود لغماني د ولسمشر محمداشرف غني په حکم د فاریاب د نوي والي په توګه د دغه ولایت مېمنې ښار د پوځ لوا مقر کې کار پیل کړ.
د نوموړي د ټاکل کېدو سره سم، د فاریاب خلک او د عبدالرشید دوستم په مشرۍ د جنبش ګوند پلویان غوښتنه کوي، چې والیان، ښاروالان او ولسوالان باید ټول د دوی په خوښه پر دندو وګمارل شي.