تاند ( دوشنبه، د جوزا ۳مه) په لغمان ولایت کې د یوه ورزشي جمنازیوم کارونه بشپړ شول.
د یاد ولایت د بدني روزنې آمر بادام ګل ملتزم وایي، په دې جمنازيوم ۳۸ ميليونه افغانۍ لګښت راغلی او په اساسي ډول جوړ شوی دی.
نوموړی وایي دا جمنازیوم د ختيځ زون په کچه لوی جمنازيوم دی، چې په جوړېدو سره يې په لغمان ولايت کې د بېلابېلو ورزشونو د لوبغاړو ډېرې ستونزې حل شوې.
په ورته وخت کې د لغمان والي رحمت الله يارمل، ژمنه وکړه چې په دې ولایت کې د ورزشکارانو ستونزو ته پر وخت رسيده ګي کوي.
هغه وويل، په دې جمنازيوم کې به په نېږدې راتلوونکي کې د زون په کچه بېلابېلې لوبې ترسره شي.
هغه وویل، ژر به د بدني روزنې آمريت غصب شوې ځمکه د غاصبينو له منګلو خلاصه او عاملينو سره به يې قانوني چلند ترسره شي.