تاند ( چهارشنبه، د ثور ۲۹مه) ولسمشرغني نن سهار د یو لوړ پوړي دولتي پلاوي په مشرۍ د کابل تخت استالف تاریخي هوټل پرانیست.
ولسمشر غني د یاد هوټل پرانیستو په مراسمو کې وویل، استالف ځانګړی ارزښت لري او له پخوا زمانو څخه تفریح ځای او د کسب و کار او حلالې روزۍ مرکز و.
هغه زیاته کړه چې د اعلیحضرت محمد ظاهر شاه د دورې د اساسي قانون مسوده هم همدلته تدوین شوې وه.
ولسمشر غني وویل موږ د جګړې ویجاړي ابادوو او زموږ په اراده کې هېڅ ډول شک نشته.
هغه د یادې ولسوالۍ د ولسونو هغه غوښتنه هم ومنله، چې د استالف ولسوالي دې په لومړۍ درجه ولسوالي بدله کړي.
د استالف تخت هوټل ودانۍ، چې د کاتبل په شمال کې په استالف و لسوالۍ کې موقعیت لري، د اعلحضرت امان الله خان د پاچهۍ په مهال جوړه شوې وه خو د تنظیمي جګړو په مهال ویجاړه شوه.
ولسمشرغني دغه راز ټینګار وکړ، چې د استالف تخت هوټل په مدیریت کې دې د دې ولسوالۍ خلکو ته واضح لومړیتوب ورکړل شي او په دې هوټل کې دې د استالف د لاسي صنایعو یو دایمي نندارتون هم جوړ شي.
په وروستیو کلونو کې د ولسمشر اشرف غني په امر د افغانستان ګڼې تاریخي ودانۍ، چې تنظیمونو ړنګې کړې وې، له سره جوړې شوې. په دغو ودانیو کې مهمې یې د دارلامان ودانۍ ده.