تاند (شنبه د ثور ۴) د افغانستان د ملي امنیت سلاکار وايي، طالبان باید په دې پوه شي چې د جګړې له لارې واک ته نه شي رسېدای، نو په خبره یې چې خپلې ستونزه دې د خبرو له لارې حل کړي.
حمدالله محب چې نن یې په کابل کې یوې خبري ناستې ته وینا کوله د ترکیې کنفرانس ته په اشارې وویل چې طالبان سولې ته اراده نه لري او نه غواړي افغانستان تلپاتې سولې ته ورسېږي.
د ښاغلي محب په خبره همدا علت دی ځکه خو دغه ډله په بېلا بېلو پلمو د جګړې دوام ته زمینه برابروي او له افغان دولت سره له مخامخ کېدو تښتي.
نوموړي وویل، ده په وار وار ټینګار کړی دی چې د طالبانو سره د خبرو پر ځای باید ستونزه له پاکستان سره حل شي ځکه د ده په خبره طالبان لاسپوڅي دي او پاکستان چې څه ډول وغواړي دغه ډله نڅولی شي.
حمدالله محب په داسې مهال دغه څرګندونې کوي چې ټاکل شوې وه د اپریل په ۲۴مه په ترکیه د افغان سولې په هکله د کنفرانس جوړ شي، خو طالبانو ویلي چې تر هغه بهرني ځواکونه په افغانستان کې وي دوی په هېڅ یوه ناسته کې ګډون نه کوي.
ټاکل شوې ده چې د ترکیې کنفرانس تر اختر وروسته د ترکیې په کوربتوب جوړ شي.
په ورته وخت کې د افغانستان د ملي امنیت رئیس ضیا سراج دې ناستې ته په خبرو کې کابل ته د امریکا د څارګرې ادارې یا سي ای اې د مشر پټ سفر تایید کړ او زیاته یې کړه چې د ترهګرۍ ګواښ ډېر جدي دی او په دې برخه کې باید ګډه، پیاوړې او کارنده مبارزه وشي.
د سراج په خبره چې صفر یو، صفر دوه، صفر درې او کي پي ایف ځواکونه د افغانستان د ملي امنیت له لوري رهبري کېږي او په بشپړه توګه د دوی تر کنټرول لاندې دي.