تاند ( دوشنبه، د حمل ۹ مه) څېړوونکي وایي، رومي بانجان روغتیايي نړۍ کې د بې شمېره روغتیايي ګټو او ګټورو موادو لرلو له امله سوپر خواړه بلل کېږي چې په ورځني ډول کارول يي د بې شمېره ناروغیو مخه نیسي او روغتیا غوره کوي.
خو اوس په جاپان کې یوې ترسره شوې څېړنې ثابته کړې چې د رومي بانجان بې مالګې جوس د کولېسټرول او وینې لوړ فشار کچه ټیټوي او په دې ډول د زړه د ناروغیو خطر کموي.
د معلوماتو پر بنسټ، دغه څېړنه کې د جاپان ۵۰۰ اوسېدونکو چې ۲۹۷ تنه يي مېرمنې او ۱۸۴ يي نارینه ول ګډون کړی و.
څېړونکي وايي، د رومي بانجان بې مالګې جوس کارولو څخه وروسته د ګډون کوونکو د کولېسټرول او وینې لوړ فشار کچه کې د پام وړ کمی ولیدل شو.
د دوی په وینا، د دغه جوس اغېز مختلف عمر لرونکو نارینه او مېرمنو کې ورته وه.
د دغې څېړنې یو ګډونوال څېړونکی وایي: «زموږ له پوهې سره سم، دا لومړنۍ څېړنه ده چې د زړه په ناروغیو د رومي بانجان اغېز څېړي. موږ دغې څېړنې لپاره د یو کال لپاره د ۵۰۰ ګډون کوونکو د کولېسټرول او وینې لوړ فشار کچه وڅېړل .»
دا په داسې حال کې ده چې تر دې وړاندې هم څېړونکو د تازه ترکاریو په اړه مختلفې تجربې او څېړنې ترسره کړي چې تر ډېره یې خوراک ګټور بلل شوی دی.