تاند ( دوشنبه، د حمل ۹) د جلال اباد ـ تورخم پر لویه لاره د ترافیکې پېښې له امله ۹ تنو ته مرګ ژوبله اوښتې ده.
دا پېښه نن سهار نږدې لس نیمې بجې د سرخ دیوال په سیمه کې شوې ده.
چارواکي وایي، په دې پېښه کې د ناوې او شاه موټر له یوه بل کرولا موټر سره ټکر کړی او له امله یې یاده مرګ ژوبله اوښتې ده.
د والي ویاند عطاالله خوګیاڼی وایي په دې پېښه کې د یو ماشوم په ګډون دوه تنه مړه شوي او د ناوې او شاه په ګډون ۷ تنه نور ژوبل شوي دي.
نوموړی وایي په ټپیانو کې درې نورې میرمنې هم شاملي دي او روغتیایي حالات یې د ډاډ وړ دی.
په ټپيانو کې ناوې هم شامله ده او روغتیايي چارواکي یې حالت ښه ښيي.
د چارواکو په خبره یاده پېښه د بې احتیاطۍ له امله رامنځته شوې ده.