تاند (دوشنبه د حمل ۲) د افغانستان د ملي دفاع وزارت وايي، د میدان وردګو په بهسودو ولسوالۍ کې د غیر مسؤلو وسلوالو د چاودېدونکو توکو یوه لویه ډیپو کشف او له منځه وړل شوې ده.
د دفاع وزارت نن دوشنبه د یوې خبرپاڼې په خپرولو سره ویلي، «د عملیاتو په پایله کې د دښمن د چاودیدونکو توکو او مهماتو ۱ لوی ډیپو, ۱ قرارګاه او په سېمه کې د ملکي خلکو د زور زیاتي په موخه د ترهګرو د اخاذي یو شمېر پوستې کشف او له منځه یوړل شوې.»
په خبرپاڼه کې دغه راز راغلي، په دغه عملیاتو کې یو موټر, ۶ ایکم مخابرې او د بیم یک ۸ مرمۍ د افغان ځواکونو لاسته ورغلي دي.
د یادونې ده چې د ملي دفاع وزارت په سیمه کې د افغان هوايي قووا د یوې څرخکې تر لوېدو وروسته د علي پور اړوند وسله والو پر ضد عملیات پيل کړي دي.
تر دې مخکې د ملي دفاع وزارت ویلي وو چې تېره ورځ هم په ځینو برخو کې د عليپور د وسله والو او افغان ځواکونو ترمنځ نښتې وشوې خو غیر مسؤلو وسله والو مقاومت نه دی کړی او پر شا تمبېدلي دي.
د دفاع وزارت زیاته کړې، بهسودو ولسوالۍ ته لا ډېر نظامیان پر لاره دي او ددغه محلي زورواکي پر ضد به خپلو عملیاتو ته ادامه ورکوي.
عليپور د میدان وردګو په بهسودو کې غیر مسؤل وسله وال دی چې د افغان حکومت پر ضد یې وسله پورته کړې ده او څو ورځې وړاندې یې کسانو د رهبري شوي توغندي پر مټ د افغان ځواکونو یوه څرخکه وویشتله چې د څلور پیلوټانو په ګډون په کې ۹ افغان پوځیان ووژل شول.
د علیپور له لوري د ملي اردو هیلي کوپتر په ایراني توغندي ویشتل شوې