تاند(یکشنبه، د حمل۱) په جنوبي اسیا کې د نیویارک ټایمز خبریال د باوري سرچینو پر اساس وايي، د میدان وردک ولایت په بهسود ولسوالي کې د افغانستان د هوايي ځواک هیلي کوپتر په ایراني توغندي ویشتل شوې ده.
بلال سروري پر خپله ټویټر پاڼه کښلي«د باوري سرچینو پر اساس، (د افغانستان د هوايی ځواک) د هیلي کوپتر د ویشتلو لپاره د ایران له میثاق وړل کېدونکي او هدایت کېدونکي توغندي کار اخیستل شوی دی. د توغندي پاتې شونې لا هم د پېښې په ځای کې شته. له میثاق توغندي څخه د هغو غیرحکومتي جګړه مارو له لوري په سوریه، عراق او یمن کې کار اخیستل کېږي چې د ایران له ملاتړه برخمن دي.»
د خپلسرو وسله والو قوماندان علیپور د دې برید مسوولیت منلی دی.
علیپور ویلي چې د افغانستان د حکومت پر ضد به یې «مبارزه« دوام ولري.
نوموړی ځان د مقاومت د جبهې مشر بولي. په سوریه کې د فاطمینو لوا هم د مقاومت جبهه بلل کېږي.
د افغانستان دفاع وزارت نن اعلان وکړ چې د علیپور د وسله والو پر ضد یې عملیات پیل کړي او د دې ډلې ۱۲ غړي یې وژلي دي.
د افغانستان ولسمشر او نورو چارواکو ویلي چې د علیپور ډله به وځپل شي او د وژل شویو پېلوټانو او امنیتي ځواکونو غچ به ورڅخه واخیستل شي.
همداراز د ملي امنیت سلاکار حمد الله محب پرون په کابل کې یوې خبري غوڼډې ته وویل چې علیپور او خپلسري وسلهوال په یادې ولسوالۍ کې د قانون د تنفیذ مخه نیسي، پر امنیتي او دفاعي ځواکونو بریدونه کوي، نو د ده په خبره د طالب او عليپور ترمنځ هېڅ توپیر نهشته.