شنبه, جون 15, 2024
Home+مساپر ته نظم | نعمان دوست

مساپر ته نظم | نعمان دوست

ښه پوهیږم زړه دې تنګ دی مساپره

خپل قسمت سره دې جنګ دی مساپره

ناهیلي دې دواړو سترګو ځنې څاڅي

د امید زړګی دې زنګ دی مساپره

***

راته ښکاري نن بیګاه دې بیا ژړلي

په رخسار دې تودو اوښکو لارې کړي

له ډیر قهره دې بار بار شونډې چیچلي

خپل نصیب ته دې له درده ښیرې کړي

***

چې موبایل کې دې رنځوره مور غږیږي

ستا د زړه له څړیکو یو الله خبریږي

خیال کې لاړ شې: هسې نه مورکۍ مې مړه شي

ګوتې سستې شي موبایل ترې وغورځیږي

***

ماشومان چې په پارکونو کې لوبیږي

تاته خپل کوچنی زوی او ورور یادیږي

د هغوی په محرومیت دې زړه دردیږي

دغه درد دې په رګونو کې بهیږي

***

چې مستانه او خندانه ځوانان وینې

څڅوې په خپلو خلکو د زړه وینې

بیوسۍ ترې د ځوانۍ نشه لوټلې

نه خبر دي له مستۍ او نه له مینې

***

پارک کې ناست یې پر څوکۍ په چورت کې تللی

د وطن یاد دې ارام له زړه لوټلی

هره خوا وي خنداګانې د زلمیانو

یو د تا د زړه بازار وي نړیدلی

***

کړکۍ پرانیزې هر خوا رڼا رڼا وي

سمندر کې د بیړیو تماشا وي

خلک ګرځي ټولوي له ژوند خوندونه

دا خو موږ یو چې ژړا وي او ژړا وي

***

د خلیج سپیره ریگزار دې جنت جوړ کړ

د ګاونډ دې هر یو (سیټهـ) په راحت موړ کړ

چا دې قدر د تڼاکو هیڅ ونکړ

بې رخۍ د زمانې دې زړګی سوړ کړ

***

ستا حسینه او ښایسته ځواني ورو- ورو ځي

څه په غم ، څه په کړاو څه په سلګو ځي

(صنوبرکاکا) رښتیا خبره کړې:

” د مفلس حُسن په یو موټی چڼو ځي”

***

عجیبه مو د وطن د مور قسمت دی

چې زوی لوی شي، نو له غیږې په الوت دی

څوک د ګیډې، څوک د سر غم وي اخیستی

چې یادیږي مې همدغه یو حالت دی

***

ربه! دا وطن مو کور کړې د خوښیو

بیرته ډک یې کړې، په خپلو ښو بچیو

که یوه دعاء د (دوست) چیرته قبلیږي

غوڅ کړې لاس چې یې وي نیت د بدبختیو

د چنګاښ ۴مه، ۱۴۰۲

نعمان دوست

LEAVE A REPLY

Please enter your comment!
Please enter your name here

- Advertisment -

ادب