تاند (دوشنبه، د غويي/ ثور ۲۱ مه) د کانونو او پټرولیم وزارت ویلي چې د کندوز ولایت د قلعهزال ولسوالۍ د سرو زرو کان د استخراج قرارداد یې له یوې کورنۍ او یوې آذربایجاني کمپنۍ سره د ۲۰.۲ میلیون ډالرو په ارزښت لاسلیک کړی دی.
د یاد وزارت په وینا، دغه پنځه کلن قرارداد له «سبحان مومند» شرکت او د آذربایجان له «ریف ګروپ» کمپنۍ سره شوی دی.
د وزارت د معلوماتو له مخې، دا پروژه د شاوخوا ۵.۹۷ کیلومتره مربع سیمې د سرو زرو استخراج رانغاړي.
وزارت وایي، قراردادي شرکتونه به د کان د عوایدو ۳۰ سلنه امتیاز (رویالټي) حکومت ته ورکوي او سربېره پر دې به ۲۰۰ زره امریکایي ډالر په ټولنیزو خدمتونو لګوي.
د کانونو او پټرولیم وزارت پر اساس، د دې پروژې له عملي کېدو سره به شاوخوا ۱۰۰ کسانو ته په مستقیم او غیرمستقیم ډول د کار زمینه برابره شي.
د کانونو او پټرولیم وزارت زیاته کړې چې د آذربایجان او قرغیزستان سفیرانو د قرارداد د لاسلیک په مراسمو کې د افغانستان د کانونو په برخه کې د اقتصادي همکاریو او پانګونې د پراختیا هرکلی کړی دی.
طالبانو تر دې وړاندې هم د افغانستان، چین، ترکیې، ایران او بریتانیا له شرکتونو سره د کانونو د استخراج اووه نور قراردادونه لاسلیک کړي دي.