تاند(چهارشنبه، د حوت ۲۰) پاکستاني طالبانو د دغه هېواد په بېلابېلو سیمو کې وسلهوال بریدونه ډېر کړي او د پولیس افسرانو د وژلو مسوولیت یې منلی.
د پاکستان د بهرنیو چارو وزارت ویلي، چې طالبان په دې بریدونو سره غواړي، چې خپل له لاسهوتلي مرکزونه بېرته فعال کړي.
ځینې سرچینې په دې هېواد کې د وسلهوالو بریدونو د لا زیاتېدو او د پاکستاني طالبانو د پياوړتیا خبرداری ورکوي.
د سرچینو په خبره، چې پاکستاني طالبانو په تېرو څو اونیو کې په شمالي او جنوبي وزیرستان کې د پاکستان پوځیان په نښه کړي، همداراز په وزیرستان کې د یوې نښتې له امله څلور ښځې وژل شوې دي.
د دې هېواد ځینې سیاسي شنونکي هم پر پوځیانو د طالبانو وروستیو بریدونو ته اندېښمن دي او دا بریدونه په پاکستان کې د تحریک بیا جوړېدلو لپاره د طالبانو یوه هڅه ګڼي.
په پاکستان کې د وروستیو خونړیو بریدونو په اړه ځینو نړیوالو رسنیو هم تحلیلونه خپاره کړي.
د جرمني د «ډي.پي.اې» خبري آژانس لیکي: “امکان لري چې له امریکا سره د سولې تړون پر پاکستاني طالبانو اغېز کړی وي.”
بلخوا پاکستاني چارواکو پوځ او پولیسو ته، د طالبانو د بریدونو د ډېرېدلو پر وړاندې د چمتووالي سپارښتنه کړې.