تاند (چهارشنبه د حوت ۲۰) ننګرهار کې يوه هلک وروسته له هغه د خپل تش په نوم خسر کور ته له ځان سره بم وړی دی چې مينه يې د کورنۍ غړيو له ده ګرځولې او بل چا ته یې ورکړې ده.
دغه ځوان ذاکر عالم نومېږي او د ننګرهار د سرخرود ولسوالۍ اوسېدونکی دی چې د سيدا ګل په نوم د يوه کليوال په لور مين و.
د ځايي چارواکو په وینا، ځوان له دغې نجلۍ سره مينه درلوده او تمه یې لرله چې دغه نجلۍ به يې د کور مېرمن شي، خو چې خبر شو هغه يې بل چا ته ورکړې، لاسي بم يې د تحفې په څېر نغښتی او له ځان سره د خپلې مینې کور ته وړی دی.
د ننګرهار د والي ویاند عطاءالله خوګیاڼي رسنیو ته ویلي، کله چې د نجلۍ په کور کې خلک راټول شوي، هلک بم ته چاودنه ورکړې چې له امله یې د همدې کورنۍ یوه مېرمنه وژل شوې او څلور نور کسان ټپیان دي.
د نوموړي په خبره، په ټپیان کې دوه ښځې، يو همدا ځوان او يو بل کس شامل دي.