تاند (جمعه د حوت ۱) د کندهار ښار د ۷مې امنیتي حوزې اړوند د پنجوايي دوه لارې په سیمه کې د ماین چاودنې ۱۴ ملکيان ټپیان کړي.
د راپورونو له مخې دغه پېښه تېر ماښام شاوخوا اته بجې رامنځته شوې.
د کندهار د امنیې قوماندانۍ ویاند جمال ناصر بارکزی وايي، چاودنه د یوې نانوايي مخې ته په بایسکل کې د ځای پر ځای شوي ماین له امله شوې چې د ماشومانو په ګډون په کې ۱۴ تنه ټپیان شوي دي.
کندهار کې د میرویس روغتون یوه ډاکټر رسنیو ته ویلي چې د پېښې له ځایه ۱۴ ټپیان وروړل شوي چې د ځینو ټپونه ژور دي.
پرون غرمه د دغه ولایت په ارغنداب ولسوالۍ کې هم د سړک غاړې ماین چاودنې دوه ملکي وګړي ټپیان کړي و.
د جمال ناصر بارکزي په خبره، چاودنه د ارغنداب ولسوالۍ په بابرو سیمه کې پر دوو ملکي وګړو شوې وه چې دواړه ملکي وګړي یې ټپيان کړي چې د یوه پښې پرې شوي او بل لږ ټپي دی.