تاند (جمعه د حومت ۱) د طبيعي پېښو پر وړاندې د مبارزې په چارو کې د دولت وزارت مسؤلان وايي، دوی له وچکالۍ سره مبارزې ته تیار دي.
د طبيعي پېښو پر وړاندې د مبارزې په چارو کې د دولت وزیر غلام بهاوالدین جیلاني پرون پنجشنبه ملت ته د حکومت د حساب ورکړې په پروګرام کې وويل، راتلونکی کال وچکالي د یو لوی ګواښ په توګه پېژندل شوی دی.
د ښاغلي جېلاني په خبره، دغه وزارت اړوندو بنسټونو سره په همغږۍ وچکالۍ سره د مبارزې کميسيون جوړ کړی دی او پر وړاندې یې مبارزې ته چمتووالي لري.
په دې کمیسیون کې د طبيعي پېښو پر وړاندې د مبارزې په چارو کې د دولت وزارت په افغانستان کې د جاپان سفارت او د ملګرو ملتونو پراختیايي پروګرام (UNDP) سره په ګډه دې پايلې ته رسېدلي چې د وچکالۍ له کبله زيان ليدونکې سيمې وپېژني او يادو سيمو ته د وچکالۍ رسېدو پر مهال دغو سيمو ته مرستې ورسېږي.
د طبيعي پېښو پر وړاندې د مبارزې په چارو کې د دولت وزیر غلام بهاوالدین جیلاني زیاته کړه، د هېواد شمال ختیځ او سوېل لوېديځې برخې به د وچکالۍ له کبله ډېرې زيانمنې شي.
نوموړی وویل، مخکې له دې چې وچکالي شي د غنمو کومې زېرمې چې په هېواد کې لرو ولایتونو ته لېږدوو او د وچکالۍ پر مهال یې په خلکو وېشو.
د طبيعي پېښو پر وړاندې د مبارزې په چارو کې د دولت وزارت مسؤلان وايي، دوی ځینې مرستې هم ځانګړې کړي او د وچکالۍ پر مهال به زیانمنو کورنیو سره مرسته وکړي.
د دوی د معلوماتو له مخې دا چې څومره کورنۍ به له وچکالۍ سره مخامخ شي، تر اوسه یې دقیق شمېر نه دی معلوم.