تاند(پنج شنبه، د دلوې ۳۰) کورنیو چارو وزارت وایي، پر لویو لارو د باج اخیستنې په برخه کې یې تر دې دمه اصلاحي اقدامات ترسره کړي او د خلکو د شکایتونو پر بنسټ یې ۱۸۶ پولیس له دندو ګوښه کړي او د پېژنتونو فعال احتیاط ته ور پېژندل شوي.
له کورنیو چارو وزارت په خپره شوې خبرپاڼه کې راغلي، د کورنیو چارو وزیر محمدمسعود اندرابي تېره ورځ د ولایتونو امنیه قوماندانانو ته یو ځل بیا په ټینګار سره لارښوونه وکړه، څو د لویو لارو په مسیر کې د اصلاحاتو د لا تقویې په پار له ترانسپورتي شرکتونو او ملي سوداګرو سره د همغږۍ ګډې غوندې ترسره کړي.
خبرپاڼه لیکي، په همدې حال کې؛ د کندهار، زابل، فاریاب، بادغیس، سمنګان، بغلان، كاپيسا، خوست، غزني او بامیان ولایتونو امنیه قوماندانانو نن د ترانسپورتي ټولنو له چارواکو او ملي سوداګرو سره وکتل او د لویو لارو پر مسیر یې د باج اخیستنې په تړاو د دوی ستونزې او اندېښنې واورېدې.
دا په داسې حال کې دی چې په له تېرو درېیو اوونیو راهیسي د کابل کندهار پر لویه لاره د باروړونکو موټرو چلوونکو کاري اعتصاب کړی او پنځه ورځې کېږي چې د کابل کندهار لویه لاره یې هم تړلي، دوی له حکومت غواړي چې پر لاره دې د پولیسو لهخوا د غیري قانوني پیسو اخیستنه بنده شي.
د موټر چلوونکو اعتصاب؛ که نن پای ته ونه رسید، ښایي د کابل ګڼ شمېر هټۍ او د تېلو پمپونه هم وتړل شي