تاند ( پنجشنبه، د دلوې ۳۰) له تېرو څو ورځو را په دېخو په کابل کې د تېلو، ګازو او خوراکي توکو بیې خورا لوړې شوي چې ښاریان یې پړه پر حکومت اچوي.
د کابل ښار یو تن اوسیدونکی فرید اغا تاند سره خبرو کې وایي: (( د ګازو بیه پخوا ۴۷ افغانۍ خو دا دوه ورځو کې تر ۹۶ لوړه شوې او نن امکان دې تر ۱۲۰ ورسیږي حکومت دې جدي پام وکړي ځکه که دا د موټر چلوونکو اعتصاب لږ نور هم وغځېد نو خلک به له سخت بحران سره مخ شي.))
خو د تیلو او ګازو د پمپونو څښتنان هم ځان ملامت نه بولي او وایي، دوی سره همدومره ګاز یا تېل وو چې ویې پلورل نور دوی هم اړ دي پمپونه وتړي.
په ورته وخت کې د افغانستان د سوداګرۍ خونې مسؤلین هم مني چې د لویو لارو بندېدو او موټر چلوونکو د کاري اعتصاب له امله د هیواد سوداګریز سکټور ته لوی اقتصادي زیان رسېدلی او خلک یې هم له ستونزو سره مخ کړي دي.
د یادې خونې مسوولین وایي، له تیرو ۱۹ ورځو راپه دېخوا د رامنځته شويو ستونزو له امله په سوداګریزو بندرونو کې په توکو بار زرګونه موټر بند پاتې دي.
که څه هم کورنیو چارو وزارت دې ستونزې ته د رسیدګي ژمنه کړې ده، خو تر اوسه په دې برخه کې عملي اقدامات نه دي شوي.
دغه وزارت بېګا شپه تاند ته په راستولې خبرپاڼه کې ویلي چې د ترانسپورتي ټولنو او موټر لرونکو هغه اندېښنې چې د لویو لارو پر مسیر یې د باج اخیستنې له امله درلودې، تر دې دمخه یو لړ اصلاحي اقدامات ترسره کړي دي.
خبرپاڼه وایي، د کورنیو چارو وزارت د مشرتابه د دستور پر بنسټ، ۱۸۶ د پولیسو هغه پرسونل چې په اړه یې شکایتونه شوي وو، له خپلو دندو ګوښه او د پېژنتون فعال احتیاط ته ور پېژندل شوي دي.
دا په داسې حال کې ده چې د تیرو څو ورځو راهیسې په افغانستان کې د لویو بار وړونکو موټرو چلوونکو د کابل ـ کندهار پر لویه لار له هغوی څخه د غیر قانوني پیسو د اخیستلو په غبرګون کې کاري اعتصاب پيل کړی دی.
ویل کیږي چې د لویو بار وړونکو د کاري اعتصاب له امله د مسافر وړونکو فعالیت هم بند شوی چې له امله زرګونه مسافر پر لارو کې بند پاتې دي.
د افغانستان د سوداګرۍ خونې د مسؤلینو سربېره؛ عام ولسونه له اړوند ارګانونو څخه غواړي چې د ستونزې د هواري په برخه کې جدي اقدام وکړي.