تاند(پنج شنبه، د دلوې ۳۰) کورنیو چارو وزارت وایي، د هرات د تورغونډۍ بندر څلور لوړپوړي چارواکي نیول شوي او کابل ته لېږدول شوي دي.
د کورنیو چارو وزارت ویاند طارق ارین ویلي، له لویو جرمونو سره د مبارزې پولیسو د هرات ولایت د تورغونډۍ بندر رئیس، مالي کارشناس، د بلانس او عوایدو مدیران د مالي فساد په تور نیولي او کابل ته یې را انتقال کړي دي.
ارین زیاته کړې، د ولسمشر د حکم له مخې، څه موده وړاندې یو پلاوی د هرات ولایت د تورغونډۍ بندر د عوایدو د څرنګوالي د څېړلو په موخه تللی و.
د هغه په خبره، د یاد پلاوي د معلوماتو له مخې، له تېرو څو کلونو راهیسې په سلګونه میلیونه راټول شوي عواید د دغو کسانو له خوا حیف میل شوي وو.
دا په داسې حال کې ده چې له تېرو څو کالو راهیسې د هېواد په ډېریو ګمرکاتو کې د فساد څرکونه لیدل کېږي او له رئیسانو سربیره ډېر ټیټ رتبه مامورین په فساد ککړ دي، چې د ډېریو قضیې هم څارنوالي ته سپارل شوي دي.