تاند ( دوشنبه، د دلوې ۲۰) ننګرهار کې د ملي امنیت ځواکونو یو ماشوم د تښتوونکو له منګولو وژغوره او خپلې کورنۍ ته یې وسپاره.
د ننګرهار والي ضیاالحق امرخېل وایي ۱۳ کلن عطاءالرحمن د ۶ ټولګي زده کوونکی دی او د اتمې ناحیې اړوند تعمیراتو سیمې څخه نن شاوخوا دولس بجې د انسان تښتوونکو له لورې تښتول شوی وو.
امرخېل زیاته کړه تښتول شوی ماشوم د پولیسو په مرسته ملي امنیت ځواکونو د کامې پول ته نږدې د عبدالله په نوم د تښتوونکي له منګولو وژغوره.
هغه وایي تښتوونکي یاد ماشوم په کورولا موټر کې لیږدوه .
نوموړی وایي امنیتي ځواکونو یاد کس په ټپي حالت کې نیولی دی چې اوس ترې څېړنې روانې دي.
۱۳ کلن عطاء الرحمن وايي : « له ښوونځي نه کورته روان وم چې ناڅاپه یو کس وسلې سره ونیولم او موټر ته یې په زوره پورته کړم نور پوه نه شوم چې څنګه او چېرته مې بیایي، چېغې مې وکړې خو غږ مې چا وانه ورېده».
د یادونې ده چې څو ورځې وړاندې یو بل قومي مشر هم ملي امنیت ځواکونو د تښتوونکو له منګولو ژغورلی وو.