تاند(یکشنبه، د دلوې ۲۰) د کورنیو چارو وزارت ویلي، د میدانوردګ ولایت په بهسود ولسوالۍ کې د ترسره شویو لاریونونو په اړه د څېړونکي پلاوي د موندنو پر بنسټ د دغه ولایت د امنیه قومندان دنده ځنډول شوې او قضیه یې څارنوالۍ ته معرفي شوې ده.
د کورنیو چارو وزارت په خپره شوې خبرپاڼه کې راغلي، د میدانوردګ ولایت په بهسود ولسوالۍ کې د ترسره شویو لاریونونو په اړه د څېړونکي پلاوي د موندنو پر بنسټ خپلې ارزونې په ټولیز ډول ترسره کړې دي.
خبرپاڼه زیاتوي، د ارزونو او یادو راپورونو له مخې؛ په بهسود ولسوالۍ کې د ۱۳۹۹ کال د سلواغې په ۱۰مه د جمعې پر ورځ د ترسره شویو لاریونونو ګډونوال غیرمسلح کسان وو، کله چې لاریونونه په تاوتریخوالي واوښتل، نو له امله یې ۱۱ تنه ملکیان شهیدان شوي او ۳۱ تنه ژوبل دي.
د خبرپاڼې په وینا، کورنیو چارو وزارت د همدې قضیې په تړاو د میدانوردګو د امنیه قوماندان دنده ځنډولې او قضیې یې څارنوالۍ ته لېږدولې، څو د قانون په رڼا کې په بنسټیز ډول وارزول شي او عدالت تامین شي.
دا په داسې حال کې دی چې څو ورځې وړاندې د میدان وردګو ولایت بهسودو ولسوالۍ کې د خلکو له لورې لاریون په لاره اچول شوی و ترڅو امنیه قومندان له دندې ګوښه کړي خو دغه لاریون په تاوتریخوالي واوښت او د ګڼو کسانو د مرګ ژوبلې سبب وګرځېد، خو د امنیتي ځواکونو په وینا دا کسان لاریون وال نه و بلکې په دې سیمه کې د میشت جنګ سالار علیپور کسان وو.