تاند ( شنبه، د دلوې ۱۸) د افغانستان لویه څارنوالي وایي، له درنو جرمونو سره د مبارزې عدلي او قضايي مرکز لومړۍ محکمې د مشرانو جرګې درې غړي، د ۴۰ زره ډالرو رشوت اخستلو په تور په ۱۰کاله، یو میاشت بند محکوم کړل.
د افغانستان لویې څارنوالۍ نن ( شنبه د دلوې ۱۸ ) د یوې خبرپاڼې په خپرولو سره ویلي چې د مشرانو جرګې درې سناتوران لیاقت الله بابکرخیل، محمد انور باشلیق او عضیم قویاش د ۴۰ زره امریکایي ډالرو بډې اخیستو په تړاو چې څه موده وړاندې د عدلي او قضایي ارګانونو له خوا بلخ ولایت کې نیول شوي وو نن محکمې هر یو په لس لس کاله او یوې میاشتې نتفیذي بند محکوم کړل.
د لویې څارنوالي خبرپاڼه دغه راز زیاتوي، په بند محکوم شوي سناتوران مکلف دي چې یاد ۴۰ زره ډالر هم بېرته تسلیم کړي.
یاد سناتوران څه موده وړاندې د حیرتان بندر د ارزونې په موخه بلخ ته تللي وو څو د فساد په اړه څېړنې وکړي، خو خپله د ۴۰ زره ډالره رشوت اخیستو په تور ونیول شول.
دا په داسې حال کې ده چې دې وروستیو کې د افغان حکومت له لوري فساد سره مبارزه ګړندۍ شوې او دې برخه کې د دا ډول لاسته راوړنو خبرونه هم ورکول کیږي.