تاند (یکشبنه د دلوې، ۱۲) د فاریاب ځايي چارواکي وايي، د دې ولایت المار ولسوالۍ بازار کې د هاوان دوو مرمیو د لګېدو له امله ۱۶ ملکي کسانو ته مرګ ژوبله اوښتې ده.
د فاریاب د امنیه قوماندانۍ ویاند عبدالکریم یورش وایي، د هاوان دوه مرمۍ د وسلوالو طالبانو له لوري پر افغان ځواکونو توغول شوي چې د المار ولسوالۍ په بازار لګیدلي او ۱۶ ملکي کسانو ته یې مرګ ژوبله اړولې ده.
یورش وايي:« نن له غرمې وړاندې شاوخوا ۱۱ بجې د وسلوالو طالبانو له لوري د المار ولسوالۍ پر بازار دوه د هاوان مرمۍ توغول شوي چې له کبله یې دوو تنو ملکي وګړو ژوند بایللی دی.»
هغه وایي په دې پیښه کې ۱۴ نور ملکي کسان ټپیان شوي هم دي.
د فاریاب د امنیه قوماندانۍ ویاند همدا راز زیاتوي چې د یادو مرمیو د لګېدو له کبله څو دوکانونو ته هم زیان رسیدلی دی.
خو وسلوالو طالبانو تر اوسه په دې اړه څه ندي ویلي.
فاریاب ولایت د هېواد په شمال کې یو له نا امنو ولایتونو څخه ګڼل کیږي چې د المار ولسوالۍ په ګډون یې ډېره برخه کې د وسلوالو طالبانو خوځښتونه فعال دي او دې وروستیو کې یې د افغان ځواکونو پر وړاندې بریدونو ته زور ورکړی دی.