تاند (یک شنبه، د دلوې ۱۲) د طالبانو د سیاسي دفتر مشر ملا برادر په ایران کې د دغه هېواد د بهرنیو چارو له وزیر جواد ظریف سره لیدلي دي.
په دغه لیدنه کې دواړو لوریو پر سوله او اړوندو موضوعاتو خبرې اترې کړې دي.
د طالبانو د سیاسي دفتر ویاند نعیم وردک وایي جواد ظریف او ملابرادر په دې ناسته کې د افغانستان پر روان وضعیت، بین الافغاني مذاکراتو، د دوحې هوکړې پر پوره عملي کېدو، سیمه او افغانستان کې د سولې پر اړتیا هم بحثونه کړې دي.
جواد ظریف په دې لیدنه کې په ټینګار سره ویلي چې موږ په افغانستان کې د یو داسې جامع اسلامي حکومت ملاتړ کوو چې په کې ټول قومونه ځان وويني.
هغه په افغانستان کې د امریکا کړنو ته په اشارې زیاته : «د افغانستان خلک ستاسو دي او باید په عملیاتو کې په نښه نشي».
جواد ظریف د افغانستان اساسي قانون او نظام ته په اشارې سره ویلي چې :«موږ نشو کولی په خلا کې شرایط په پام کې ونیسو ، دا شرایط د راتلونکي ګډ حکومت لاسته راوړلو لپاره په پام کې نیول کېدی شي.»
ایران داسې مهال دا څرګندونې کوي چې دمګرۍ عام افغانان د شېرمحمد عباس ستانکزي هغو څرګندونو چې په کې د ولسمشر غني د استعفاغوښتنه ېې کړې سخت په غوصه کړي.
عام افغانان وایي هر هغه څوک چې د افغان حکومت ، اساسي قانون او د اوسني نظام پر ضد خبري کوي د ټولو افغانانو دښمن دی.
د دوی په خبره هیچا ته به اجازه ورنه کړي چې شته نظام وننګوي او یاهم یې هم د وراني هڅه وکړي.
د یادونې ده چې په دوحه کې د سولې بین الافغاني مذاکرات په ټپه ولاړ دي.
د ملا برادر په مشرۍ د طالبانو یو پلاوی ایران او د عباس ستانکزي په مشرۍ یو بل پلاوی بیا د مسکو په سفر وتلي دي.