تاند (پنجشنبه د دلوې ۹) د ننګرهار والي ضیاء الحق امرخېل د لښکر اسلام ډلې د مشر منګل د وژل کېدو خبر ورکوي.
ښاغلي امرخېل نن پنجشنبه ماښام مهال پر خپل ټوېتر لیکلي چې منګل باغ د ننګرهار د اچین ولسوالۍ په باندر درې، څېړۍ کڅونه سیمه کې د خپلو دوو ملګرو سره د ځای پر ځای شوي ماین په چادنه کې وژل شوی دی.
د #لشکر اسلام ترهګریزې ډلې مشر منګل باغ نن له غرمې مخکې د #ننګرهار د اچين ولسوالۍ باندر درې څېړۍ کڅونه سيمه کې د خپلو دوو ملګرو سره د دوی له لوري د ځای پر ځای شوي ماين په چاودنه کې ووژل شو، منګل باغ په ياده سيمه کې په ګڼ شمېر ترهګريزو فعاليتونو کې لاس درلود. pic.twitter.com/OvHxXIiGql
— Ziaulhaq Amarkhil (@ZiaulhaqAmarkhi) January 28, 2021
د ننګرهار والي وايي، منګل نن له غرمې مخکې وژل شوی او زیاته کړې یې ده چې نوموړي په ياده سيمه کې په ګڼ شمېر ترهګريزو فعاليتونو کې لاس درلود.
پاکستاني چارواکو ویلي، د منګل باغ په مشرۍ د لښکر اسلام ډله په خیبر پښتونخوا کې د خونړیدو بریدونو مسوله ده.
د یادونې وړ ده چې منګل باغ څه موده وړاندې د افغان ځواکونو په هوایي برید کې سخت ټپي شوی هم و.
منګل باغ ډلې تر اوسه د خپل مشر د وژل کېدو په هکله کوم څه نه دي ویلي.