تاند (چهارشنبه د دلوې ۱) د ولسي جرګې د دوو غړیو روح الله خانزاده او خالد مومند تر استعفا وروسته نن له کندهاره عبدالخالق بالاکرزي او له لوګر څخه محمد صدیق حسن زاده ددې جرګې د غړیتوب لوړه وکړه.
تر دې وړاندې روح الله خانزاده د کندهار د خلکو او خالد مومند په ولسي جرګه کې د لوګر د خلکو استازي وو.
د ټاکنو قانون د ۵۰مې مادې درېیمې فقرې پر اساس، هغه کس چې له ولسي جرګې استعفا ورکوي او یا مړ کېږي، د هغه ځای ناستي لپاره یادې جرګې ته به هغه کس ور پېژندل کېږي چې له هماغه ولایته یې د دې جرګې په تېرو ټاکنو کې تر نورو ډېرې رایې تر لاسه کړي وي.
د ټاکنو خپلواک کمېسیون دارالانشا رئیس حبیب الرحمن ننګ ویلي چې په ولسي جرګه کې د یادو ولایتونو د دواړو استازو استعفاوې د جرګې دارالانشا له لارې یاد کمېسیون ته سپارل شوې او هغوی ته یې ټاکنیزه وثیقه ورکړې ده.
په ولسي جرګه کې د لوګر د خلکو پخواني استازي خالد مومند ویلي چې دې جرګې ته یې د کورنیو ستونزو له امله د تېرې جدي میاشتې په ۲۰ استعفا ورکړې او زیاته کړې یې ده چې ټاکل شوې له هېواده بهر ولاړ شي.
دغه راز د ولسي جرګې ریاست دفتر د معلوماتو پر اساس، په دې جرګه کې د کندهار د خلکو پخواني استازي روح الله خانزاده د والي په توګه له ټاکل کېدو وروسته، د تېرې جدي میاشتې په لسمه د یادې جرګې له غړیتوبه استعفا کړې ده چې پر ځای یې نن عبدالخالق بالاکرزي د وفادارۍ لوړه وکړه.
د یادونې ده چې عبدالخالق بالاکرزي د ملي شورا په شپاړسمه تقنیني دوره کې هم د ولسي جرګې غړیتوب درلود او د محمد صدیق حسن زاده دا لومړی ځل دی چې دې جرګې ته لاره مومي.