تاند ( یک شنبه، د قوس ۳۰) وروسته تر هغه چې په ټولنیزو رسنیو د ولایتي ویاندویانو د بستونو د لغوه کېدو په اړه یولیک خپورشو تازه په هکله د سیمه ییزو ارګانونو خپلواکې ادارې وضاحت ورکړی دی.
دغې ادارې ویلي « په سيمه ییزه کچه د مؤثرې اطلاع رسونې په موخه به محترم والیان د خپلو ولایتونو اړوند اطلاعات، پرمختګونه او جریانونه له رسنیو سره شریکوي. د ولایتونو د اطلاعاتو او عامه اړیکو عمومي مدیران چې تر دې دمه یې د ویاندویۍ چارې هم پر غاړه وې، له دې وروسته به د ولایت د رهبرۍ لپاره له عمومي وضعیت او جریانونو څخه د اطلاعاتو راټولولو، د محلي مسؤلینو او رسنیو تر منځ د اړیکو د تامین، د کنفرانسونو او خبري ناستو د تنظیم، د محلي ادارې او مختلفو اقشارو تر منځ د روابطو د ټينګښت، د والي په همغږۍ د ولایت د ټولییزو رسنیو او اجتماعي صفحاتو د مدیریت او یو شمېر نور اړین مسؤلیتونه پر مخ وړي.»
سرچینې زیاته کړې چې دوی د دولت د عامه او ستراتیژيکو اړیکو د کانالونو په مؤثریت، د تبلیغاتي دستګاه پر انسجام او د شریکېدونکو اطلاعاتو د چټکتیا او تدقیق پر مېکانېزمونو فکر کوي.
سرچینه وایي: «موږ به هڅه وکړو چې په مرکز او محلاتو کې د پر وخت او دقیقو اطلاعاتو د شریکولو له لارې روڼتیا او حساب ورکول ترویج، ولسي نظارت زیات او د دولت ولسي اعتبار لا پیاوړی کړو.»
د ولایتي ویاندویانو د دندو د لغوه کېدو پرېکړه له هغه وروسته شوې کله چې د تخار د والي ویاند جواد هجري په دغه ولایت کې پر ماشومانو د شوې بمبارۍ د تلفاتو خبر خپور کړ.
په داسې حال کې چې حکومت ټول وژل شوي ماشومان وسلوال طالبان بللي وه.
د ارګ دا پرېکړه په ټولنیزو رسنیو کې هم غندل شوې ده او د دې رسنیو یو شمېر کاروونکو ویلي چې ولسمشر او ډلې یې د احساساتو او خپلو کړنو د پټولو په موخه دا پرېکړه کړې ده.