تاند (سه شنبه د عقرب ۲۷) د پروان ځايي چارواکي وايي، د سیاه ګرد ولسوالۍ امنیه قوماندان نورخدا د نامعلومو وسله والو په برید کې وژل شوی دی.
د والي ویانده وحیده شهکار وايي دا پېښه تېره شپه څه باندې ۹ بجې د کاپیسا ولایت د مرکز اړوند د ګلدان په سیمه کې رامنځ ته شوې ده.
هغې زیاته کړې، امنیه قوماندان له یوې مېلمستیا څخه د کور په لور روان و، چې د ګلدان په سیمه کې نامعلومو کسانو پرې برید کړی او وژلی یې دی.
د کاپیسا د والي ویاند عبدالشایق شورش بیا وايي چې نور خدا تېره شپه د ولایتي شورا د یوه غړي مېلمه و.
د ښاغلي شورش په خبره په دغه وسله وال برید کې نور خدا او د هغه یو ساتونکی وژل شوي او یو بل ټپي دی، چې پولیسو په دې هکله څېړنې پیل کړي دي.
تر اوسه کوم چا یا ډلې ددغې پېښې مسؤلیت نه دی منلی.