تاند(یکشنبه، د عقرب ۱۱) د راپورونو له مخې د طالبانو او افغان حکومت مذاکراتي پلاوي پرېکړه کړې چې قطر به د یوه دریم ګړي په توګه د دواړو لورو ترمنځ پر اختلافي مواردو د حل لپاره د اسانچاري رول ترسره کوي.
له څه باندې یوې میاشتې راهیسې د دواړو لورو ترمنځ خبرې پیل شوې دي خو تر دې دمه پر تګلاره هوکړې ته نه دي رسېدلي چې د اختلافونو په دوام دواړه لوري په دې مذاکراتو کې د قطر ګډون ته تیار شوي دي.
د طالبانو د قطر دفتر ویاند بیا وایي په مذاکراتو کې د هېڅ هېواد مداخله نه مني او قطر هم یوازې د اسانچاري په توګه منل شوی دی.
د افغان حکومت د مذاکراتي پلاوي غړي وایي چې د تماس ډلو ترمنځ هره ورځ خبرې کېږي خو تر دې دمه کوم توافق نه دی رامنځ ته شوی.
بل خوا طالبانو ته نږدې سرچینې او د سولې د برخې فعالین هم وایي چې قطر د یوه بې طرفه هېواد په توګه په دې مذاکراتو کې ښه رول لوبولی شي.
د سولې د برخې فعال او پخوانی طالب چارواکی سید اکبر اغا وايي ښایي د وخت په تېرېدو ډېر لوري د سولې په مذاکراتو کې د اسانچاري رول ولوبوي ځکه دې چارې ته اړتیا ده.