تاند (چهارشنبه د میزان ۲۳) د افغانستان د ملي دفاع وزارت وايي هلمند کې د دوو څرخکو د غورځېدو پېښه کې ۹ کسان وژل شوي دي.
له یاد وزارت څخه په خپره شوې اعلامیه کې راغلي، چې تېره شپه شاوخوا یوه بجه د افغان پوځ دوه (MI-17) څرخکې د تخنیکي ستونزې له امله د هلمند په ناوه ولسوالۍ کې لوېدلې دي.
په اعلامیه کې دغه راز راغلي په دې پېښه کې ۹ کسان وژل شوي او هیلیکوپټر هم له منځه تللي دي.
د چارواکو په وینا چې دا پېښه به وڅېړي او نور معلومات به وروسته له رسنیو سره شریک شي.
تر وړاندې داسې راپورونه خپاره شوي وو چې د افغان ځواکونو دې هیلیکوپټرو ټکر کړی او پکې ناست ۱۵ کمنډویان او ۴ پیلوټان وژل شوي دي.
د یادونې وړ ده چې د هلمند په ناوې، نادعلي او د مرکز لښکرګاه په ځینو سیمو کې د افغان ځواکونو او طالبانو تر منځ له تېرو درېیوو ورځو راپدېخوا سختې جګړې روانې دي، چې پکې د درنې مرګژوبلې راپورونه ورکړل شوي دي.